കേരളാ പൊലീസിന് ഇനി നവീകരിച്ച വെബ് പോര്‍ട്ടല്‍
May 19, 2020
തിരുവനന്തപുരം: കേരള പോലീസിന്‍റെ നവീകരിച്ച വെബ്സൈറ്റ് സംസ്ഥാന പോലീസ് മേധാവി ലോക്നാഥ് ബെഹ്റ ഉദ്ഘാടനം ചെയ്തു. നിലവിലുള്ള keralapolice.gov.in എന്ന വിലാസത്തില്‍ത്തന്നെ ലഭിക്കുന്ന വെബ്സൈറ്റ് സ്റ്റേറ്റ് ക്രൈം റിക്കാര്‍ഡ്സ് ബ്യൂറോയിലെ സാങ്കേതിക വിദഗ്ധരാണു തയാറാക്കിയത്.
നവീകരിച്ച വെബ്സൈറ്റില്‍ പൊതുജനങ്ങള്‍ക്കും പോലീസ് ഉദ്യോഗസ്ഥര്‍ക്കും പ്രത്യേക വിഭാഗങ്ങള്‍ ഏര്‍പ്പെടുത്തിയിട്ടുണ്ട്. പോലീസ് ഉദ്യോഗസ്ഥര്‍ മാത്രം അറിഞ്ഞിരിക്കേണ്ട വകുപ്പുതല ഉത്തരവുകളും സര്‍ക്കുലറുകളും ലോഗിന്‍ ചെയ്തു മാത്രമേ കാണാന്‍ കഴിയൂ. പോലീസ് ഉദ്യോഗസ്ഥര്‍ക്കു നിലവില്‍ ഉള്ള അയാപ്സ് യൂസര്‍നെയിമും പാസ്‌വേഡും നല്‍കി ലോഗിന്‍ ചെയ്യാം. നിലവിലുള്ള വെബ്സൈറ്റിലെ വിവരങ്ങള്‍ പുതിയ വെബ്സൈറ്റിലേക്കു പൂര്‍ണമായി മാറ്റുന്നതുവരെ പഴയ വെബ്സൈറ്റ് old.keralapolice. gov.in എന്ന വിലാസത്തില്‍ ലഭിക്കും. നവീകരിച്ച വെബ്സൈറ്റില്‍ വിവരങ്ങള്‍ ഇനിമുതല്‍ ഇംഗ്ലീഷിലും മലയാളത്തിലും ലഭിക്കും.
