കിറ്റെക്സ് ഗാര്‍മെന്‍റ്സിന് റെക്കോര്‍ഡ് നേട്ടം

കൊച്ചി: കുട്ടികളുടെ വസ്ത്ര നിര്‍മാണ രംഗത്ത് ലോകത്ത് രണ്ടാം സ്ഥാനത്തുള്ള കിറ്റക്സ് ഗാര്‍മെന്‍റ്സിന് വരുമാനത്തില്‍ റെക്കോര്‍ഡ് നേട്ടം. ഡിസംബര്‍ 31ന് അവസാനിച്ച മൂന്നാം പാദത്തില്‍ കമ്പനിയുടെ മൊത്തം വരുമാനം 85 ശതമാനം വര്‍ധിച്ച് 258.93 കോടി രൂപയിലെത്തി. എക്കാലത്തേയും ഉയര്‍ന്ന വര്‍ധനയാണിത്. മുന്‍ വര്‍ഷം ഇതെ പാദത്തില്‍ 140.22 കോടി രൂപയായിരുന്നു. നികുതി ഉള്‍പ്പെടാത്ത ലാഭം 8.82 ശതമാനത്തില്‍ നിന്നും 14.12 ശതമാനമായും ഉയര്‍ന്നു. നടപ്പു സാമ്പത്തിക വര്‍ഷം മൂന്നാം പാദത്തില്‍ കമ്പനിയുടെ അറ്റാദായം 36.56 കോടി രൂപയിലെത്തി. മുന്‍വര്‍ഷം ഇതേ കാലയളവില്‍ 12.35 കോടി രൂപയായിരുന്നു.

കമ്പനിയുടെ സഞ്ചിത ഓഹരി വരുമാനം ഓഹരി ഒന്നിന് 5.50 രൂപ  എന്ന നിരക്കിലാണ്. മുന്‍ സാമ്പത്തിക വര്‍ഷം മൂന്നാം പാദത്തില്‍ ഇത് 1.86 രൂപയായിരുന്നു. പലിശ, നികുതി തുടങ്ങിയവ ഉള്‍പ്പെടെയുള്ള സഞ്ചിത വരുമാനം (ഇ.ബി.ഐ.ടി.ഡി.എ) മുന്‍ വര്‍ഷത്തെ 29.58 കോടി രൂപയില്‍ നിന്ന് 105 ശതമാനം വര്‍ധിച്ച് 60.62 കോടിയിലെത്തി. കമ്പനിയുടെ ഒമ്പതുമാസ കാലയളവിലെ മൊത്ത വരുമാനം 36 ശതമാനം വര്‍ധിച്ച് 614.77 കോടി രൂപയിലെത്തി. കഴിഞ്ഞ സാമ്പത്തിക വര്‍ഷം ഇതേ കാലയളവില്‍ 453.59 കോടി രൂപയായിരുന്നു. ഒമ്പതുമാസ കാലയളവിലെ അറ്റാദായം 57 ശതമാനം വര്‍ധനവോടെ 89.45 കോടി രൂപയിലുമെത്തി.