ആസ്റ്റർ സ്ഥാപനങ്ങൾ ഇന്ത്യയിലും ജി.സി.സിയിലും രണ്ട്​ സ്വതന്ത്ര സ്ഥാപനങ്ങളാകും​

ദുബൈ: പ്രമുഖ ആരോഗ്യ സേവന ദാതാക്കളായ ആസ്റ്റർ ഡി.എം ഹെൽത്ത്‌കെയറിന്‍റെ ഇന്ത്യയിലെയും ജി.സി.സിയിലെയും സംരംഭങ്ങൾ വ്യത്യസ്ത രണ്ട്​ സ്വതന്ത്ര സ്ഥാപനങ്ങളാകുമെന്ന്​ പ്രഖ്യാപിച്ചു. ആസ്റ്ററിന്‍റെ ജി.സി.സി ബിസിനസിൽ നിക്ഷേപിക്കുന്നതിന് യു.എ.ഇ ആസ്ഥാനമായുള്ള സ്വകാര്യ ഇക്വിറ്റി സ്ഥാപനമായ ഫജർ കാപ്പിറ്റലിന്‍റെ നേതൃത്വത്തിലുള്ള നിക്ഷേപകരുടെ കൺസോർഷ്യവുമായി കരാറിലെത്തിയതായും കമ്പനി വെളിപ്പെടുത്തി. ഇന്ത്യയിൽ ആസ്റ്റർ ഡി.എം ഹെൽത്ത് കെയർ ലിമിറ്റഡ്, ഗൾഫിൽ ആസ്റ്റർ ഡി.എം ഹെൽത്ത് കെയർ എഫ്​.ഇസെഡ്​.സി എന്നിങ്ങനെയായിരിക്കും പ്രവർത്തനം.

വേർപിരിയൽ പദ്ധതി പ്രകാരം, ജി.സി.സി ബിസിനസിന്‍റെ 65 ശതമാനം ഓഹരികൾ ഫജ്ർ കാപ്പിറ്റലിന്‍റെ നേതൃത്വത്തിലുള്ള കൺസോർഷ്യം ഏറ്റെടുക്കും. അതേസമയം 35 ശതമാനം ഓഹരികൾ നിലനിർത്തിക്കൊണ്ട് ജി.സി.സി ബിസിനസ്​ നിയന്ത്രിക്കുന്നത്​ മൂപ്പൻ കുടുംബം തന്നെയായിരിക്കും. ഗ്രൂപ്പിന്‍റെ ഇന്ത്യയിലെയും ജി.സി.സിയിലെയും നിലവിലെ വിപണി മൂല്യം ഏകദേശം 200 കോടി ഡോളറാണ്. ഇടപാട് പ്രകാരം ജി.സി.സി ബിസിനസിന്​ 170 കോടി ഡോളറിന്‍റെ എന്‍റർപ്രൈസ് മൂല്യവും 100 കോടി ഡോളറിന്‍റെ ഇക്വിറ്റി മൂല്യവുമാണ്​ വിലമതിക്കുന്നത്​.

ഇന്ത്യ, ജി.സി.സി പ്രവർത്തനങ്ങളെ വേർതിരിക്കുന്ന തീരുമാനം രണ്ട് സ്ഥാപനങ്ങൾക്കും ന്യായമായ മൂല്യം സ്ഥാപിക്കുന്നതിനാണെന്നും അതത് വിപണികളിലെ വളർച്ചാ അവസരങ്ങൾ പ്രയോജനപ്പെടുത്താൻ കഴിയുന്ന കേന്ദ്രീകൃത സ്ഥാപനങ്ങളെ സൃഷ്ടിക്കാൻ ഇത്​ സഹായിക്കുമെന്നും ഡോ. ആസാദ് മൂപ്പൻ പറഞ്ഞു.

സ്ഥാപകനും ചെയർമാനും എന്ന നിലയിൽ ഡോ. ആസാദ് മൂപ്പൻ പ്രവർത്തനം തുടരുകയും ഇന്ത്യയിലെയും ജി.സി.സിയിലെയും ബിസിനസുകളുടെ മേൽനോട്ടം വഹിക്കുകയും ചെയ്യും. അലീഷാ മൂപ്പൻ ജി.സി.സി ബിസിനസിന്‍റെ മാനേജിങ്​ ഡയറക്ടറും ഗ്രൂപ്പ് സി.ഇ.ഒയും ആയി മാറും. ഇന്ത്യയിലെ ആസ്റ്റർ ബിസിനസിന്‍റെ സി.ഇ.ഒ ആയി ഡോ. നിതീഷ് ഷെട്ടി തുടരും.

1987ൽ ദുബൈയിൽ ഒരൊറ്റ ക്ലിനിക്കായി ഡോ. ആസാദ്​ മൂപ്പൻ സ്ഥാപിച്ച ആസ്റ്റർ ഡി.എം ഹെൽത്ത്‌കെയറിന്​ നിലവിൽ ഇന്ത്യയിൽ 19 ആശുപത്രികളും, യു.എ.ഇ, സൗദി അറേബ്യ, ഖത്തർ, ഒമാൻ, ബഹ്‌റൈൻ, ജോർഡൻ എന്നിവിടങ്ങളിലായി ഗൾഫിൽ 15 ആശുപത്രികളുമുണ്ട്​. ക്ലിനിക്കുകളും ഫാർമസികളുമായി നൂറുക്കണക്കിന്​ മറ്റു സ്ഥാപനങ്ങളുമുണ്ട്​.