എണ്ണവില വൈകാതെ നൂറിലെത്തിയേക്കാം

അടിസ്ഥാനകാര്യങ്ങളും, ജിയോ പൊളിറ്റിക്കൽ കാരണങ്ങളുമാണ് ആഗോള വിപണിയിൽ എണ്ണയെ നയിക്കുന്നത്. മാസങ്ങൾക്കു ശേഷം ആഗോള എണ്ണവില കഴിഞ്ഞയാഴ്ച 90 ഡോളർ പിന്നിട്ടു.

ഈ മാസം ആദ്യം ബ്രെന്റ് ഓയിൽ വില ബാരലിന് 85- 90 ഡോളറിനു മുകളിലായതിനാൽ, ചില ഷോർട്ട് സെല്ലർമാർ അവരുടെ പൊസിഷനുകൾ ഒഴിഞ്ഞു. വിപണികളിൽ തുടരുന്ന വിതരണ പ്രശ്‌നങ്ങളും, ശക്തമായ ഡിമാൻഡും വർഷത്തിന്റെ രണ്ടാം പകുതിയിൽ എണ്ണവില വീണ്ടും ഉയർത്തുമെന്നു കരുതുന്നു.

വിദഗ്ധരുടെ പ്രവചനങ്ങൾ കണക്കിലെടുക്കുമ്പോൾ ആഗോള എണ്ണവില ഉടൻ തന്നെ 95 ഡോളറിലേയ്ക്കു നീങ്ങിയേക്കാം. രണ്ടാം പകുതിയിൽ വില 100 ഡോളർ വരെ രേഖപ്പെടുത്തിയേക്കാമെന്നും ചില പ്രവചനങ്ങൾ സൂചിപ്പിക്കുന്നു.

ഇസ്രായേലിനെതിരേ ഇറാൻ നേരിട്ട് പടയൊരുക്കം നടത്തിയാൽ കാര്യങ്ങൾ കൂടുതൽ സങ്കീർണമാകും. യുഎസ് ഇടപെടലിനെ തുടർന്ന് റഷ്യയ്‌ക്കെതിരേയുള്ള നീക്കം യുക്രൈൺ മയപ്പെടുത്തിയതാണ് ഏക ആശ്വസം.

യുക്രൈൻ ആക്രമണങ്ങൾ റഷ്യൻ റിഫൈനറി പ്രവർത്തനങ്ങളെ ബാധിച്ചതോടെയാണ് ആഗോള എണ്ണവില വീണ്ടും കുതിക്കാൻ തുടങ്ങിയത്. ഇത് കാര്യങ്ങൾ കൂടുതൽ വഷളാക്കുമെന്നു യുഎസ് തിരിച്ചറിവാണ് ഇടപെടലിനു കാരണം.

അതേസമയം ഒപെക്ക് പ്ലസ് ലക്ഷ്യങ്ങൾ നിറവേറ്റാൻ റഷ്യൻ സർക്കാർ പ്രാദേശിക കമ്പനികൾക്ക് നിർദേശം നൽകിയത് കൂന്നിൻമേൽ കുരുവായി. ഇത് ആഗോള വിപണികളിലേയ്ക്കുള്ള എണ്ണയുടെ വരവ് കുറച്ചു.

യുഎസിലും ഡ്രില്ലിംഗ് പ്രവർത്തനങ്ങൾ കുറഞ്ഞുവരുന്നു. പ്രവർത്തനക്ഷമമായ റിഗ്ഗുകളുടെ എണ്ണം മാസംതോറും കുറഞ്ഞുവരുന്നുവെന്നു റിപ്പോർട്ടുകൾ വ്യക്തമാക്കുന്നു. ആഗോള എണ്ണ ആവശ്യകത വർധിക്കുന്ന സമയത്താണ് ഈ വെല്ലുവിളികൾ എന്നു പ്രത്യേകം എടുത്തുപറയണം.

ചൈനയുടെ തിരിച്ചുവരവ് തന്നെയാണ് എടുത്തുപറയേണ്ടത്. ലോകത്തെ ഒന്നാം നമ്പർ എണ്ണ ആവശ്യക്കാരാണ് ചൈന. റിപ്പോർട്ടുകൾ പ്രകാരം ഇവരുടെ ആവശ്യകത മാസംതോറും കൂടി വരുന്നു.

ഊഹക്കച്ചവടക്കാരുടെ കളികളും എണ്ണയെ മുകളിൽ നിർത്തുന്നു. വർഷാദ്യം കുറഞ്ഞ നിരക്കിൽ കൂടെ കൂട്ടിയ എണ്ണ ഇവർ ഉയർന്ന വിലയ്ക്ക് വിറ്റ് ലാഭമെടുക്കുന്നു. ഊഹക്കച്ചവടക്കാരുടെ ഈ നീക്കം എണ്ണവിലയിൽ നേരിയ തിരത്തലുകൾക്കു വഴിവയ്ക്കുന്നു.

അതേസമയം വില ഇനിയും ഉയരുമെന്ന പ്രതീക്ഷയിൽ പൊസിഷനുകൾ തുടരുന്നവരും കുറവല്ല. ഊഹക്കച്ചവടക്കാർക്കെതിരേ സൗദി പല പ്രാവശ്യം നേരിട്ട് പ്രതികരിച്ചിട്ടുള്ളതാണ്.

അതേസമയം ആഗോള എണ്ണവില പിടിവിട്ട് ഉയർന്നാൽ പണപ്പെരുപ്പ ആശങ്കകൾ വീണ്ടും വർധിച്ചേക്കാം. എണ്ണവില 90 ഡോളറിനു മുകളിൽ തുടർന്നാൽ ആവശ്യകത കുറഞ്ഞേക്കും.

ഇതു എണ്ണവിലയിൽ തിരുത്തലിനു വഴിവയ്ക്കുമെന്നു വിദഗ്ധർ വിശ്വസിക്കുന്നു. നിലവിൽ ആഗോള വിപണിയിൽ ബ്രെന്റ് ക്രൂഡ് ബാരലിന് 90.76 ഡോളറും, ഡബ്ല്യുടിഐ ക്രൂഡ് ബാരലിന് 86.77 ഡോളറുമാണ്.