ഇന്ത്യൻ ടെലികോം വിപണിയിൽ വലിയ കിടമത്സരമാണ് ഇപ്പോൾ നടക്കുന്നത്. സ്വകാര്യ ടെലികോം കമ്പനികൾ അരങ്ങു വാണിരുന്ന മേഖലയിൽ പൊതുമേഖലാ സ്ഥാപനമായ അപ്രതീക്ഷിതമായി ഭാരത് സഞ്ചാർ നിഗം ലിമിറ്റഡ് (BSNL) മുന്നേറ്റം നടത്തിയതാണ് കാര്യങ്ങൾ മാറ്റിമറിച്ചത്.
നിലവിൽ ബി.എസ്.എൻ.എൽ അതിവേഗത്തിൽ 4G നെറ്റ് വർക്ക് വികസിപ്പിച്ചു കൊണ്ടിരിക്കുകയാണ്. സ്വകാര്യ ടെലികോം കമ്പനികളുമായി മത്സരിക്കുന്നതിന് തങ്ങളുടെ സേവനങ്ങൾ മെച്ചപ്പെടുത്താനുളള്ള തീവ്രശ്രമത്തിലാണ് കമ്പനി. കേരളത്തിൽ മാർച്ചിന് മുമ്പ് 4G സേവനങ്ങൾ പൂർണമായി നൽകാനാണ് ശ്രമം
കേരളവും ബി.എസ്.എൻ.എല്ലും
2025 മാർച്ച് 31ന് മുമ്പ് കേരളത്തിലെ 6,931 ടവറുകളിലും 4G സജ്ജമാക്കാനാണ് ബി.എസ്.എൻ.എൽ ശ്രമിക്കുന്നത്.
നിലവിൽ 4,800ൽ അധികം ടവറുകളിൽ സംസ്ഥാനത്ത് 4G സേവനം ലഭ്യമാണ്. മാർച്ചോടെ ബാക്കിയുള്ള എല്ലാ ടവറുകളിലും 4G സങ്കേതം ലഭ്യമാക്കാനാണ് ശ്രമം. നിലവിൽ കവറേജ് സംബന്ധിച്ച പ്രശ്നങ്ങളുള്ള ഇടങ്ങളിലും ലക്ഷ്യമിട്ടതിൽ ഭൂരിഭാഗം ടവറുകളും സ്ഥാപിച്ചിട്ടുമുണ്ട്.
വികസിക്കുന്ന 4G നെറ്റ് വർക്ക്
2024 ആഗസ്റ്റോടെ 30,000 4G ടവറുകൾ ഇൻസ്റ്റാൾ ചെയ്യാനാണ് ബി.എസ്.എൻ.എൽ ലക്ഷ്യമിട്ടത്. ഇവയിൽ ഇതുവരെ 15,000 ടവറുകൾ ഇൻസ്റ്റാൾ ചെയ്തിട്ടുണ്ട്.
അടുത്ത ഏതാനും മാസങ്ങൾക്കകം ലക്ഷ്യമിട്ട നമ്പറിലേക്ക് എത്താനുള്ള അതിവേഗ ശ്രമങ്ങളാണ് കമ്പനി നടത്തുന്നതെന്ന് റിപ്പോർട്ടുകൾ സൂചന നൽകുന്നു.
ലക്ഷ്യം സമഗ്രമായ കവറേജ്
2025 വർഷത്തിന്റെഅവസാനത്തോടെ 20,000 പുതിയ 4G ടവറുകൾ കൂടി ഇൻസ്റ്റാൾ ചെയ്ത് രാജ്യത്തുട നീളം 4G സേവനങ്ങൾ ലഭ്യമാക്കാനാണ് ഉദ്ദേശിക്കുന്നത്.
ഒരേ സമയം രാജ്യത്തെ ഗ്രാമീണ-നാഗരിക മേഖലകളിലേക്ക് സേവനം എത്തിക്കുകയാണ് ലക്ഷ്യം. ഇത്തരത്തിൽ സമഗ്രമായ കവറേജ് നേടാനാണ് ശ്രമം. ഇതോടെ മികച്ച കണക്ടിവിറ്റി, ഇന്റർനെറ്റ് സ്പീഡ് എന്നിവ ലഭ്യമാകുമെന്ന് കമ്പനി അറിയിച്ചു. അടുത്തിടെ രാജ്യത്തെ 15 നഗരങ്ങളിൽ ബി.എസ്.എൻ.എൽ സേവനങ്ങൾ ലോഞ്ച് ചെയ്തിരുന്നു.
ഇന്ത്യയിൽ ഉടനീളമുള്ള 4G സൈറ്റുകൾ പ്രവർത്തനക്ഷമമാകാൻ തയ്യാറാണെന്നും, വൈകാതെ ആക്ടീവ് ആകുമെന്നും കമ്പനിഅറിയിച്ചു.
രാജ്യത്തുടനീളം 4G സ്ട്രാറ്റജിക് റോൾ ഔട് നടത്തുന്നതിന് മുന്നോടിയായി ബോസ്റ്റൺ കൺസൾട്ടിങ് ഗ്രൂപ്പിന്റെ (BCG) സേവനങ്ങളും ബി.എസ്.എൻ.എൽ തേടിയിട്ടുണ്ട്. കസ്റ്റമർ സേവനങ്ങൾ വർധിപ്പിക്കുന്നതിനായി നിർമിത ബുദ്ധി അധിഷ്ഠിത ചാറ്റ് ബോട്ടിന്റെ വികസനവും നടന്നു കൊണ്ടിരിക്കുന്നു.
ബി.എസ്.എൻ.എൽ 5G
രാജ്യത്തെ തെരഞ്ഞെടുത്ത നഗരങ്ങളിൽ ഈ വർഷം തന്നെ 5G സേവനങ്ങൾ ലഭ്യമാക്കാനും കമ്പനി ഉദ്ദേശിക്കുന്നുണ്ട്. 5G നെറ്റ് വർക്കുമായി ബന്ധപ്പെട്ട പ്രവൃത്തികൾ അതിവേഗം പുരോഗമിക്കുന്നതായും ട്രയൽ ഫേസ് ഏതാണ്ട് പൂർത്തിയായെന്നും ബി.എസ്.എൻ.എൽ അറിയിച്ചു.
ആത്മനിർഭർ ഭാരതിന് കീഴിൽ തദ്ദേശീയമായ സാങ്കേതിക വിദ്യകൾ പ്രയോജനപ്പെടുത്തിയാണ് സേവനങ്ങൾ ലഭ്യമാക്കുക. ബി.എസ്.എൻ.എൽ 4G ടവറുകളിൽ ചെറിയ മാറ്റങ്ങൾ വരുത്തി 5G സേവനങ്ങളും നൽകാനാകുമെന്ന് നേരത്തെ തന്നെ ബി.എസ്.എൻ.എൽ അറിയിച്ചിരുന്നു.
