ലോകത്ത് അതിവേഗത്തിൽ വളരുന്ന സമ്പദ്ഘടനകളിലൊന്നാണ് ഇന്ത്യയുടേത്. സമീപകാലത്തായി അടിസ്ഥാന സൗകര്യ വികസനങ്ങളിൽ കൂടുതൽ ശ്രദ്ധകേന്ദ്രീകരിച്ച്, മികച്ച നിലയിലേക്ക് പുരോഗതി കൈവരിക്കാനും അതിവേഗത്തിൽ വളരാനുമുള്ള ശ്രമത്തിലാണ് രാജ്യം.
സ്വാതന്ത്ര്യം നേടിയതിന്റെ നൂറാം വാർഷികത്തിൽ വികസിത സമ്പദ്ഘടനയായി മാറുകയെന്നതാണ് കേന്ദ്ര സർക്കാരിന്റെ ലക്ഷ്യം. ഇതിനിടെ രാജ്യത്തിന്റെ സാമ്പത്തിക വളർച്ചയെ കുറിച്ചുള്ള പുതിയ അനുമാന കണക്കുകളുമായി പ്രമുഖ ഗവേഷണ ഏജൻസിയായ ഇന്ത്യാ റേറ്റിങ്സ് രംഗത്തെത്തി.
2047 സാമ്പത്തിക വർഷത്തോടെ ഇന്ത്യയിലെ എട്ട് സംസ്ഥാനങ്ങളുടെ മൊത്തം ആഭ്യന്തര ഉത്പാദനം (ജിഡിപി) ഒരു ട്രില്യൺ (ഒരു ലക്ഷം കോടി) ഡോളർ നേട്ടത്തിൽ എത്തിച്ചേരുമെന്നാണ് ഇന്ത്യാ റേറ്റിങ്സിന്റെ നിഗമനം.
രാജ്യത്തെ 28 സംസ്ഥാനങ്ങൾക്കിടയിൽ നടത്തിയ പഠനത്തിൽ നിന്നും മഹാരാഷ്ട്ര, കർണാടക, ഗുജറാത്ത് തുടങ്ങിയ സംസ്ഥാനങ്ങളാകും ആദ്യമായി ഒരു ട്രില്യൺ ഡോളർ നേട്ടത്തിൽ എത്തുകയെന്നും ഇതു 2039 സാമ്പത്തിക വർഷത്തോടെ സംഭവ്യമാകും എന്നാണ് ഗവേഷണ ഏജൻസിയുടെ റിപ്പോർട്ടിൽ സൂചിപ്പിച്ചത്.
ഇന്ത്യയിലെ സംസ്ഥാനങ്ങളുടെ കൂട്ടത്തിൽ നിന്നും മഹാരാഷ്ട്രയാകും ഒരു ട്രില്യൺ ഡോളർ ജിഡിപി എന്ന നേട്ടത്തിലേക്ക് ആദ്യം എത്തിച്ചേരുക. തൊട്ടുപിന്നാലെ കർണാടകയും ഗുജറാത്തും ഒരു ട്രില്യൺ ഡോളർ ജിഡിപിയിലേക്ക് എത്തിച്ചേരുമെന്നാണ് ഇന്ത്യാ റേറ്റിങ്സിന്റെ അനുമാനം.
2041 സാമ്പത്തിക വർഷത്തോടെ തമിഴ്നാടും 2042 കാലയളവോടെ ഉത്തർപ്രദേശും ഒരു ട്രില്യൺ ഡോളർ ജിഡിപി പദവിയിലേക്ക് ഉയരുമെന്നും ഗവേഷണ ഏജൻസിയുടെ റിപ്പോർട്ടിൽ സൂചിപ്പിച്ചു.
നിലവിൽ 2028 സാമ്പത്തിക വർഷത്തോടെ സംസ്ഥാനത്തിന്റെ ജിഡിപി ഒരു ട്രില്യൺ ഡോളർ നിലവാരം മറികടക്കാനാണ് മഹാരാഷ്ട്ര ശ്രമിക്കുന്നത്. അതുപോലെ തമിഴ്നാടും ഉത്തർപ്രദേശും 2030-ഓടെയും കർണാടക 2032 സാമ്പത്തിക വർഷത്തോടെയും ഒരു ട്രില്യൺ ഡോളർ സ്വന്തമാക്കാനാണ് ലക്ഷ്യമിടുന്നത്. എന്നാൽ ഇതിനു കൂടുതൽ സമയം വേണ്ടിവരുമെന്നാണ് ഇന്ത്യാ റേറ്റിങ്സിന്റെ റിപ്പോർട്ടിൽ വ്യക്തമാക്കുന്നത്.
അതേസമയം 2028 സാമ്പത്തിക വർഷത്തോടെ 5 ട്രില്യൺ ഡോളർ നിലവാരം മറികടക്കാനാണ് ഇന്ത്യ ലക്ഷ്യമിടുന്നത്. നിലവിലുള്ള വളർച്ചാ നിരക്ക് പ്രകാരം, ഈ ഘട്ടത്തിൽ മൂന്ന് സംസ്ഥാനങ്ങളുടെ ജിഡിപി മാത്രമാകും 0.5 ട്രില്യൺ നിലവാരത്തിന്റെ സമീപത്തുണ്ടാകുക.
അതുപോലെ വിവിധ സംസ്ഥാനങ്ങളുടെ ആളോഹരി വരുമാനം വികസിത രാജ്യങ്ങളുടെ നിലവാരത്തിലേക്ക് എത്തിച്ചേരാൻ ഏറെ സമയമെടുത്തേക്കും എന്നും ഇന്ത്യാ റേറ്റിങ്സിന്റെ റിപ്പോർട്ടിൽ ചൂണ്ടിക്കാട്ടി.
2014 സാമ്പത്തിക വർഷത്തിൽ ജിഡിപിയുടെ അളവിൽ രാജ്യത്തെ എട്ടാമത്തെ വലിയ സംസ്ഥാനമായിരുന്നു കേരളം. എന്നാൽ 2023 പിന്നിടുമ്പോഴേക്കും ജിഡിപി റാങ്കിങ്ങിൽ കേരളം പതിനൊന്നാം സ്ഥാനത്തേക്ക് താഴ്ന്നു.
അതുപോലെ 2005 സാമ്പത്തിക വർഷത്തിൽ സംസ്ഥാനങ്ങളുടെ ആളോഹരി വരുമാനത്തിൽ കേരളം നാലാം സ്ഥാനത്തായിരുന്നു. എന്നാൽ 2014ൽ ആറാം സ്ഥാനത്തേക്കും 2023 സാമ്പത്തിക വർഷത്തിൽ എട്ടാം സ്ഥാനത്തേക്കും പിന്തള്ളപ്പെട്ടു.