ആഹാ ഗാനം ആഘോഷമാക്കിയ താരങ്ങൾ ” ആവേശത്തോടെ കൈയ്യടിച്ച് സ്വീകരിച്ച് ആരാധകർ

ഇന്ദ്രജിത് സുകുമാരന്റെ ജന്മദിനമായ ഇന്നലെയാണ് ആഹാ സിനിമയുടെ അണിയറക്കാർ ഇന്ദ്രജിത്തിന് പിറന്നാൾ സമ്മാനമായി ചിത്രത്തിന്റെ തീം സോങ് വീഡിയോ പുറത്തു വിട്ടത് . അക്ഷരാർത്ഥത്തിൽ താരത്തിന് ആശംസകൾ നേർന്നു കൊണ്ട് ഈ സന്ദർഭത്തെ ആഘോഷമാക്കി മാറ്റി മലയാള സിനിമാ താരങ്ങൾ ഒന്നടങ്കം . മെഗാ സ്റ്റാർ മമ്മൂട്ടിയും , സൂപ്പർ സ്റ്റാർ മോഹൻ ലാലും , തമിഴ് താരങ്ങളായ കാർത്തി ,വിജയ് സേതുപതി എന്നിവരുമാണ് ഇന്ദ്രജിത്തിന് ആശംസകൾ നേർന്നു കൊണ്ട് ഔദ്യോദികമായി ഗാനം തങ്ങളുടെ സോഷ്യൽ മീഡിയ പേജുകളിലൂടെ റിലീസ് ചെയ്‌തത്‌ . അതിനു പിറകെ മലയാളത്തിലെ യുവ താരനിര ഒന്നടങ്കം തങ്ങളുടെ പേജുകളിലൂടെ ആശംസകൾ നേർന്ന് ഗാനം പങ്കിട്ടതോടെ ആരാധകരും

” കടം കഥായായ് നെഞ്ചിൽ കനലായ്
ചങ്കിലെ നിണമായ് ഈ വടം
ഒന്നായ് ഒഴുകാം ഉള്ളം നിറയാം
ചുമരുകൾ തകരാൻ ഒരു വടം “

എന്ന ഗാന വീഡിയോ ആവേശത്തോടെ സ്വീകരിച്ചു നെഞ്ചിലേറ്റി . ജുബിത് നമ്രദത് രചിച്ച് സയനോരാ ഫിലിപ്പ് സംഗീതം പകർന്നു അർജ്ജുൻ ആലപിച്ചതാണ് ഈ ഗാനം . ദൃശ്യ ചാരുത കൊണ്ടും ചിത്രീകരണത്തിലെ വൈവിധ്യം കൊണ്ടും ആകർഷണീയമായ ഈ ഗാനത്തിൽ അഭിനയിച്ചിട്ടുള്ള പ്രധാന അഭിനേതാക്കൾ അമിത് ചക്കാലക്കൽ, മനോജ് കെ ജയൻ , അശ്വിൻ കുമാർ എന്നിവരാണ്. കേരളത്തിൻ്റെ തനതു കായിക വിനോദമായ വടം വലിയുടെ പാശ്ചാത്തലത്തിലുള്ള വൈകാരികതയും പ്രണയവും സംഘർഷവും ഇഴ ചേർന്ന ഒരു പ്രമേയത്തിൻ്റെ ദൃഷ്യാവിഷ്‌ക്കാരമാണ് ചിത്രം. നവാഗതനായ ബിബിൻ പോൾ സാമുവേൽ സംവിധാനം ചെയ്ത ” ആഹാ” സാ സാ പ്രൊഡക്ഷൻസിൻ്റെ ബാനിൽ പ്രേം എബ്രഹാമാണ് നിർമ്മിച്ചിരിക്കുന്നത്