പ്രധാന നഗരങ്ങളിലെ ആഡംബര ഭവന വില്‍പ്പന 151 ശതമാനം വര്‍ദ്ധിച്ചു
May 8, 2023
ന്യൂഡല്‍ഹി: റിയല്‍ എസ്റ്റേറ്റ് കണ്‍സള്‍ട്ടന്റ് സിബിആര്‍ഇയുടെ റിപ്പോര്‍ട്ട് അനുസരിച്ച് 2023 ജനുവരി-മാര്‍ച്ച് പാദത്തില്‍ ആഡംബര ഭവന വില്‍പ്പന 151 ശതമാനം വര്‍ദ്ധിച്ചു. ആഢംബര ഭവന വില്‍പനയില്‍ 216 ശതമാനം വളര്‍ച്ചയോടെ ഡല്‍ഹി-എന്‍സിആര്‍ മുന്നിട്ടുനില്‍ക്കുന്നു. ഡല്‍ഹി-എന്‍സിആറിന് പുറമെ, മുംബൈ, ഹൈദരാബാദ്, പൂനെ, കൊല്‍ക്കത്ത എന്നിവയുള്‍പ്പെടെയുള്ള നഗരങ്ങളിലും ഉയര്‍ന്ന നിലവാരമുള്ള യൂണിറ്റുകള്‍ക്ക് ഉയര്‍ന്നഡിമാന്റുണ്ടായി.
എന്നിരുന്നാലും, ബെംഗളൂരുവിലെ ആഡംബര വില്‍പ്പന മാറ്റമില്ലാതെ തുടര്‍ന്നു. ‘2023 ജനുവരി-മാര്‍ച്ച് മാസങ്ങളില്‍ മൊത്തം 78,000 ഭവന യൂണിറ്റുകളാണ് വില്‍പന നടത്തിയത്. ഈ കാലയളവില്‍ ഏകദേശം 81,000 യൂണിറ്റുകള്‍ ലോഞ്ച് ചെയ്യപ്പെട്ടപ്പോള്‍ ഇതില്‍ 49 ശതമാനം മിഡ് എന്‍ഡ് വിഭാഗത്തില്‍ പെട്ടവയാണ്. തുടര്‍ന്ന് താങ്ങാനാവുന്ന / ബജറ്റ് പ്രോജക്റ്റുകള്‍’ റിപ്പോര്‍ട്ട് പറയുന്നു.
മാര്‍ച്ചില്‍ അവസാനിച്ച പാദത്തില്‍ മുംബൈയില്‍ മൊത്തം ഭവന വില്‍പ്പന 44 ശതമാനവും ഹൈദരാബാദില്‍ 800 ശതമാനവും കൊല്‍ക്കത്തയില്‍ 100 ശതമാനവും പൂനെയില്‍ 13 മടങ്ങും ഉയര്‍ന്നു. മുംബൈ, പൂനെ, ഡല്‍ഹി-എന്‍സിആര്‍ എന്നി യൂണിറ്റുകളുടെ വില്‍പ്പനയുടെ 62 ശതമാനം വഹിക്കുന്നു.
മൊത്തം ഭവന യൂണിറ്റുകളുടെ എണ്ണത്തില്‍ മുംബൈ (19,000 യൂണിറ്റ്), പൂനെ (18,000 യൂണിറ്റ്), ഡല്‍ഹി-എന്‍സിആര്‍ (11,600 യൂണിറ്റ്), ബെംഗളൂരു (11,500 യൂണിറ്റ്) എന്നിവയാണ് മുന്നില്‍. പകര്‍ച്ചവ്യാധിക്ക് ശേഷം ആഡംബര ഭവനങ്ങള്‍ വാങ്ങുന്നതിന് ജനങ്ങള്‍ മുന്‍ഗണനനല്‍കുന്നു.
