‘ഭാര്യയും മകളുമുണ്ടെന്ന് ഓര്‍മ വേണം’; പൃഥ്വിരാജിനെ ഓര്‍മിപ്പിച്ച്‌ സുപ്രിയ
March 6, 2025
നായകനായും സംവിധായകനായും പൃഥ്വിരാജിന്റേതായി ഒരുപിടി ചിത്രങ്ങളാണ് പുറത്തിറങ്ങാനിരിക്കുന്നത്. മോഹൻലാലിനെ നായകനാക്കി പൃഥ്വിരാജ് സംവിധാനം ചെയ്യുന്ന എമ്ബുരാനാണ് അക്കൂട്ടത്തില്‍ ആരാധകർ ഏറ്റവും ആകാംക്ഷയോടെ കാത്തിരിക്കുന്നത്.
ലൂസിഫറിന്റെ രണ്ടാം ഭാഗമായ എമ്ബുരാൻ മാർച്ച്‌ 27നാണ് തിയേറ്ററുകളില്‍ എത്തുന്നത്. ചിത്രത്തിന്‍റെ ഒരോ അപ്ഡേറ്റും വളരെ ആവേശത്തോടെയാണ് സോഷ്യല്‍ മീഡിയ കാണുന്നത്. എന്നാല്‍ പൃഥ്വിരാജിന്‍റെ പുതിയ ലുക്കാണ് ഇപ്പോഴത്തെ ചർച്ചാവിഷയം.
ക്ലീന്‍ ഷേവ് ചെയ്‌ത ലുക്കിലുള്ള ചിത്രം പൃഥ്വിരാജ് തന്നെയാണ് തന്‍റെ ഇന്‍സ്റ്റഗ്രാമിലൂടെ പങ്കുവെച്ചത്. സംവിധാനം ചെയ്‌ത സിനിമ പൂർത്തിയായെന്നും ഇനി നടനെന്ന നിലയില്‍ പുതിയ രൂപമാണെന്നുമാണ് പൃഥ്വിരാജ് പോസ്റ്റിന് താഴെ കുറിച്ചിരിക്കുന്നത്. ചിത്രം അതിവേഗമാണ് വൈറലായത്.
എന്നാല്‍ പൃഥ്വിരാജിന്‍റെ ഭാര്യ സുപ്രിയ മേനോന്‍റെ കമന്‍റാണ് ശ്രദ്ധനേടുന്നത്. ഭാര്യയും മോളുമുണ്ടെന്ന് ഓര്‍മ വേണം എന്നായിരുന്നു സുപ്രിയയുടെ കമന്‍റ്. നിരവധി പേരാണ് സുപ്രിയയുടെ കമന്‍റിന് താഴെ പ്രതികരണവുമായി എത്തിയത്.
ഹോളിവുഡ് താരങ്ങള്‍ അടക്കം വൻ താരനിരയുമായാണ് എമ്ബുരാൻ എത്തുന്നത്. ചിത്രത്തിലെ കഥാപാത്രങ്ങളെ പരിചയപ്പെടുത്തുന്ന വിഡിയോകള്‍ വലിയ രീതിയില്‍ ശ്രദ്ധനേടിയിരുന്നു. മലയാളത്തിന് പുറമെ തമിഴ്, തെലുങ്ക്, കന്നഡ, ഹിന്ദി ഭാഷകളിലും എമ്ബുരാൻ തിയേറ്ററുകളില്‍ എത്തും.
