2050ഓടെ രാജ്യത്തിന്റെ പ്രകൃതി വാതക ഉപഭോഗം മൂന്നരട്ടിയായി വർധിക്കുമെന്ന് യുഎസ് എനർജി ഇൻഫർമേഷൻ അഡ്മിനിസ്ട്രേഷൻ (ഇഐഎ).
ഇന്ത്യയുടെ വ്യവസായ വിപുലീകരണവും, ഉയർന്ന ഇന്ധന ആവശ്യം നിറവേറ്റുന്നതിനായി വർധിച്ചുവരുന്ന എണ്ണ ശുദ്ധീകരണവുമാണ് ഇതിനു കാരണമായി പറഞ്ഞുവരുന്നത്. ഫോസിൽ ഇന്ധനങ്ങൾ കുറയ്ക്കാനുള്ള സർക്കാരിന്റെ പ്രതിജ്ഞാബദ്ധതയും ഇതിനു കാരണമാകും.
2022-ൽ, ഇന്ത്യയുടെ പ്രകൃതിവാതക ഉപഭോഗം പ്രതിദിനം 7.0 ബില്യൺ ക്യുബിക് അടിയായിരുന്നു (ബിസിഎഫ്/ഡി). ആവശ്യകതയുടെ 70 ശതമാനവും വ്യാവസായിക മേഖലയിൽ നിന്നാണെന്നത് പ്രത്യേകം ശ്രദ്ധിക്കണം.
2050 ആകുമ്പോഴേക്കും ഇന്ത്യയുടെ പ്രകൃതി വാതക ഉപഭോഗം 23.2 ബില്യൺ ക്യുബിക് അടിയാകുമെന്നാണ് ഇഐഎയുടെ വിലയിരുത്തൽ.
അഞ്ച് ഉപഭോഗ മേഖലകളിൽ വ്യാവസായിക മേഖലയുടെ വാതക ഉപഭോഗം ഏറ്റവും കൂടുതൽ വളരുമെന്നു കരുതപ്പെടുന്നു. ഇത് മൊത്തം ഉപഭോഗത്തിന്റെ 80 ശതമാനം ആയി ഉയരും.
ഗതാഗത മേഖലയുടെ ഉപഭോഗം 10 ശതമാനമയി ഉയരുമെന്നും റിപ്പോർട്ട് പറയുന്നു. എണ്ണ ഉൽപന്നങ്ങൾക്കായുള്ള ഇന്ത്യയുടെ ആഭ്യന്തര ഡിമാൻഡ് നിലനിർത്താൻ എണ്ണ ശുദ്ധീകരണത്തിലെ ഇന്ത്യയുടെ വാതക ഉപഭോഗം ഗണ്യമായി വളരുമെന്നും പ്രതീക്ഷിക്കുന്നു.
2050 ഓടെ, അടിസ്ഥാന രാസവസ്തുക്കളുടെ ഉൽപാദനത്തിനായുള്ള വാതക ഉപഭോഗം 250 ശതമാനത്തിൽ കൂടുതലും, ശുദ്ധീകരണത്തിനായി 400 ശതമാനത്തിൽ കൂടുതലും വർദ്ധിക്കും.
2050 ലെ ഇന്ത്യയുടെ വ്യാവസായിക പ്രകൃതി വാതക ആവശ്യകതയുടെ 79 ശതമാനം ഈ രണ്ട് വ്യവസായങ്ങളും ചേർന്ന് വഹിക്കുമെന്നും റിപ്പോർട്ട് കൂട്ടിച്ചേർത്തു.
രാജ്യം അതിന്റെ ശുദ്ധീകരണ ശേഷി വർധിപ്പിക്കുകയാണ്. 2028 വരെയുള്ള ഓരോ വർഷവും രാജ്യം അതിന്റെ ശുദ്ധീകരണ ശേഷി 1.12 ദശലക്ഷം ബിപിഡി വർധിപ്പിക്കേണ്ടതുണ്ട്. 2023 അവസാനം കേന്ദ്രം പാർലമെന്റിൽ വ്യക്തമാക്കിയ കാര്യമാണിത്.
മൊത്തം ഇന്ത്യൻ ശുദ്ധീകരണ ശേഷി പ്രതിവർഷം 254 ദശലക്ഷം മെട്രിക് ടണ്ണിൽ നിന്ന് അഞ്ച് വർഷത്തിനുള്ളിൽ 22 ശതമാനം വർദ്ധിക്കുമെന്ന് പ്രതീക്ഷിക്കുന്നു. ഇത് ഏകദേശം 5.8 ദശലക്ഷം ബിപിഡിക്ക് തുല്യമാണ്.
എണ്ണ ശുദ്ധീകരണവും മറ്റ് വ്യാവസായിക ഉൽപ്പാദനവും മൂലമുള്ള ഇന്ത്യയുടെ ഗ്യാസ് ഡിമാൻഡ് 2050 ഓടെ 4.4 ശതമാനം വാർഷിക നിരക്കിൽ വളരുമെന്ന് പ്രതീക്ഷിക്കുന്നതായി ഇഐഎ പ്രവചനങ്ങൾ വ്യക്തമാക്കുന്നു.
മറ്റൊരു അതിവേഗം വളരുന്ന സമ്പദ്വ്യവസ്ഥയായ ചൈനയുടെ വാർഷിക വാതക ഉപഭോഗ നിരക്കായ 2.0 ശതമാനത്തിന്റെ ഇരട്ടിയിലധികം വരും ഇന്ത്യയുടേതെന്നു സാരം.
ഇന്ത്യയുടെ സമ്പദ്വ്യവസ്ഥ ലോകത്തെ മറ്റെല്ലാ പ്രധാന സമ്പദ്വ്യവസ്ഥകളേക്കാളും വേഗത്തിൽ വളരുന്നുവെന്നും വ്യക്തമാക്കുന്നതാണ് ഈ കണക്കുകൾ. ഈ വളർച്ചയ്ക്കൊപ്പം തന്നെ രാജ്യത്തിന്റെ ഊർജ ആവശ്യകതയും കുതിക്കുന്നു.
2030 ന് മുമ്പ് ചൈനയെ മറികടന്ന്, ആഗോള എണ്ണ ആവശ്യകത വളർച്ചയുടെ ഏറ്റവും വലിയ ചാലകമായി ഇന്ത്യ മാറുമെന്നു വിദഗ്ധർ പ്രതീക്ഷിക്കുന്നു.
ആഗോള എണ്ണ വിപണി ഇന്നു കലുഷിതമാണ്. വിലസ്ഥിരത കൈവരിക്കാൻ എണ്ണയ്ക്കു സാധിക്കുന്നില്ല. മിഡിൽ ഈസ്റ്റ് സംഘർഷങ്ങൾ വ്യാപിക്കുന്നതും, ചെങ്കടലും, പണപ്പെരുപ്പ ഭീതിയും, യുദ്ധങ്ങളുമാണ് നിലവിൽ എണ്ണതെ അസ്വസ്ഥമാക്കുന്നത്. എണ്ണ കയറിയിറങ്ങി കളിക്കുകയാണ്.
