ഇക്കഴിഞ്ഞ സാമ്പത്തിക വർഷം അവസാനിച്ച, 2025 മാർച്ചിൽ നേട്ടമുണ്ടാക്കി ഭാരത് സഞ്ചാർ നിഗം ലിമിറ്റഡ് (BSNL). ടെലികോം റെഗുലേറ്ററി അതോറിറ്റി ഓഫ് ഇന്ത്യയുടെ (TRAI) സബ്സ്ക്രിപ്ഷൻ ഡാറ്റ പ്രകാരമുള്ള 2025 മാർച്ചിലെ കണക്കുകളാണ് പുറത്തു വന്നത്.
ഇത് പ്രകാരം വോഡഫോൺ ഐഡിയ ഒഴികെയുള്ള എല്ലാ ടെലികോം സേവന ദാതാക്കൾക്കും പുതിയ സബ്സ്ക്രൈബേഴ്സിനെ ലഭിച്ചിട്ടുണ്ട്. ഇക്കഴിഞ്ഞ മാർച്ചിൽ രാജ്യത്താകെ 29.31 ലക്ഷം പുതിയ മൊബൈൽ സബ്സ്ക്രൈബേഴ്സാണ് പുതിയതായി ഉണ്ടായിരിക്കുന്നത്.
ഇന്ത്യയിലെ ഏറ്റവും വലിയ ടെലികോം സേവന ദാതാക്കൾ എന്ന സ്ഥാനം റിലയൻസ് ജിയോ നില നിർത്തിയിട്ടുണ്ട്. 2025 മാർച്ചിൽ ജിയോയ്ക്ക് 21.74 ലക്ഷം പുതിയ ഉപയോക്താക്കളെ ലഭിച്ചു.
ഇതോടെ കമ്പനിയുടെ ആകെ സബ്സ്ക്രൈബേഴ്സിന്റെ എണ്ണം 49.97 കോടിയിലെത്തി. വിപണി വിഹിതത്തിൽ രണ്ടാം സ്ഥാനത്തുള്ള എയർടെല്ലിന് പുതിയതായി 12.50 ലക്ഷം ഉപയോക്താക്കളെയാണ് ലഭിച്ചത്. 2025 മാർച്ചിൽ കമ്പനിയുടെ ആകെ സബ്സ്ക്രൈബേഴ്സിന്റെ എണ്ണം 38.98 കോടിയാണ്.
ജിയോയും, എയർടെല്ലും ഇത്തരത്തിൽ നേട്ടമുണ്ടാക്കിയപ്പോൾ ഇന്ത്യയിലെ മറ്റൊരു പ്രമുഖ ടെലികോം സേവന ദാതാവായ വോഡഫോൺ ഐഡിയയ്ക്ക് ഉപയോക്താക്കളെ നഷ്ടപ്പെടുകയാണുണ്ടായത്.
2025 മാർച്ച് മാസത്തിൽ 5.41 ലക്ഷം സബ്സ്ക്രൈബേഴ്സിനെയാണ് കമ്പനിക്ക് നഷ്ടമായത്. ഇതോടെ കമ്പനിയുടെ ആകെ ഉപയോക്താക്കളുടെ എണ്ണം 20.53 കോടി എന്ന നിലയിലെത്തി. 2025 ഫെബ്രുവരിയിൽ കമ്പനിക്ക് 20,000 ഉപയോക്താക്കളെയും നഷ്ടമായിരുന്നു.
പൊതുമേഖലാ സ്ഥാപനമായ ബി.എസ്.എൻ.എല്ലിന് 2025 മാർച്ചിൽ 49,177 പുതിയ ഉപയോക്താക്കളെ ലഭിച്ചു. ഇതോടെ ആകെ യൂസേഴ്സിന്റെ എണ്ണം 9.10 കോടിയായി മാറി. അതേ സമയം തൊട്ടു മുമ്പത്തെ മാസമായ ഫെബ്രുവരിയിൽ കമ്പനിക്ക് 5.67 ലക്ഷം ഉപയോക്താക്കളെ നഷ്ടപ്പെട്ടിരുന്നു.
5G ഫിക്സഡ് വയർലെസ് ആക്സിസ് (FWA) വിപണിയിലും റിലയൻസ് ജിയോ മേധാവിത്തം തുടരുന്നു. ഭാരതി എയർടെല്ലാണ് ഇവിടെയും രണ്ടാം സ്ഥാനത്തുള്ളത്. 2025 മാർച്ചിൽ ഇന്ത്യയിൽ 4.97 ലക്ഷം പുതിയ FWA കണക്ഷനുകളാണ് ഉണ്ടായത്.
ഇതിൽ 3.34 ലക്ഷം ജിയോയുടേതും, 1.63 ലക്ഷം എയർടെല്ലിന്റേതുമാണ്. 2025 മാർച്ച് 31 പ്രകാരമുള്ള കണക്കുകളിൽ ജിയോയുടെ FWA സബ്സ്ക്രൈബേഴ്സിന്റെ എണ്ണം 55.7 ലക്ഷവും, എയർടെല്ലിന്റേത് 11.9 ലക്ഷവുമാണ്.