എയർടെൽ ഓഹരി ഉടമകളുടെ ലാഭവിഹിതം നാലരട്ടിയായി ഉയർത്തുമെന്ന് ബ്രോക്കറേജ്

ഭാരതി എയർടെൽ ജിയോയെ മറികടക്കുമോ? എയർടെൽ മൂന്നാം പാദത്തിൽ തുടർച്ചയായ വരുമാന വളർച്ച കൈവരിക്കുമെന്നാണ് പ്രവചനങ്ങൾ. റിലയൻസ് ജിയോയും വോഡഫോൺ ഐഡിയയുമായി താരതമ്യം ചെയ്യുമ്പോൾ എയർടെൽ നേട്ടമുണ്ടാക്കുമെന്നാണ് കണക്കുകൂട്ടൽ.

താരിഫ് വർധനയും മൊബൈൽ ബ്രോഡ്‌ബാൻഡ് ഉപയോക്താക്കളുടെ നയം മാറ്റവുമൊക്കെ ടെലികോം കമ്പനികളുടെ വരുമാനത്തെ ബാധിക്കാനിടയുണ്ട്.

വരുമാനം വർധിച്ചാൽ ഭാരതി എയർടെൽ ഓഹരി ഉടമകൾക്ക് ഇരട്ടി ലാഭവിഹിതം നൽകിയേക്കും എന്ന് റിപ്പോ‍ർട്ടുകളുണ്ട്. ഓഹരി ഉടമകൾക്ക് കഴിഞ്ഞ വർഷം ലഭിച്ചതിനേക്കാൾ ഇരട്ടിയിലധികം ലാഭവിഹിതം ഈ സാമ്പത്തിക വർഷത്തിൽ ലഭിച്ചേക്കുമെന്ന് ബ്രോക്കറേജ് സ്ഥാപനമായ എച്ച്എസ്ബിസി സൂചിപ്പിക്കുന്നു.

എച്ച്എസ്ബിസി ഭാരതി എയർടെല്ലിൽ ഇപ്പോൾ ബൈ റേറ്റിങ് നൽകിയിട്ടുണ്ട്. ബുധനാഴച രാവിലെ നേരിയ ഇടിവോടെ 1586.35 രൂപയിലാണ് ഓഹരി വില. 1,940 രൂപയാണ് നൽകിയിരിക്കുന്ന ടാ‍ർഗറ്റ് വില. ചൊവ്വാഴ്ചത്തെ ക്ലോസിംഗ് ലെവലിൽ നിന്ന് 22 ശതമാനം വില ഉയരുമെന്നാണ് പ്രവചനം.

നാലിരട്ടിയായി ലാഭ വിഹിതം ഉയരുമോ?
2025 സാമ്പത്തിക വർഷത്തിൽ എയർടെല്ലിൻ്റെ ലാഭവിഹിതം 114 ശതമാനം എങ്കിലും വർധിക്കുമെന്നാണ് എച്ച്എസ്ബിസിയുടെ പ്രവചനം. 2025 സാമ്പത്തിക വർഷത്തിൽ ഒരു ഷെയറിന് 17 രൂപയായി ലാഭ വിഹിതം ഉയ‍ർന്നേക്കുമെന്നാണ് എച്ച്എസ്ബിസി പ്രതീക്ഷിക്കുന്നത്.

അടുത്ത മൂന്ന് വർഷത്തിനുള്ളിൽ ഭാരതി എയർടെൽ നാലിരട്ടിയായി ലാഭവിഹിതം ഉയ‍ർത്തുമെന്നാണ് ബ്രോക്കറേജിൻ്റെ പ്രവചനം.

2026-27 സാമ്പത്തിക വ‍ർഷത്തിൽ 34 രൂപയായി ഡിവിഡൻ്റ് ഉയ‍രുമെന്നാണ് എച്ച്എസ്ബിസി പ്രവചിച്ചിരിക്കുന്നത്. ഓരോ ഉപയോക്താവിൽ നിന്നുമുള്ള ശരാശരി വരുമാനം ഉയരുന്നു.ഹോം ബ്രോഡ്‌ബാൻഡ് വരിക്കാരുടെ എണ്ണത്തിലും വ‍ർധനയുണ്ട്. എയർടെലിൽ 2024 സാമ്പത്തിക വർഷത്തിൽ 39,000 കോടി രൂപയുടെ ക്യാഷ് ഫ്ലോ റിപ്പോർട്ട് ചെയ്തിരുന്നു.

എയർടെല്ലും ജിയോയും ഡിസംബർ പാദത്തിൽ വരിക്കാരുടെ എണ്ണം ഉയ‍ർത്തിയിട്ടുണ്ട്. എന്നാൽ 4ജി സബ്‌സ്‌ക്രൈബർമാർ ഉൾപ്പെടെയുള്ള വിയുടെ ഉപയോക്താക്കൾ കുറയുകയാണ്.

എയർടെല്ലും ജിയോയും ഉപഭോക്തൃ അടിത്തറ വർദ്ധിപ്പിക്കാൻ സാധ്യതയുണ്ട്. ബിഎസ്എനിലേക്ക് പോർട്ട് ചെയ്ത നിരവധിപർ നെറ്റ്‌വർക്കിന് ഗുണനിലവാരമില്ലാത്തതിനാൽ മടങ്ങിവരുന്നുണ്ട്. 2021 നവംബറിനുശേഷം ടെലികോം രംഗത്ത് ഏറ്റവും വലിയ നിരക്കുയർത്തൽ കഴിഞ്ഞ ജൂലൈയിൽ ഉണ്ടായിരുന്നു.

വിവിധ താരിഫുകൾക്ക് 11 മുതൽ 25 ശതമാനം വരെയാണ് നിരക്ക് ഉയർന്നത്. ഇത് ഈ രംഗത്ത് നിന്ന് കൂടുതൽ പേർ കൊഴിഞ്ഞുപോകാൻ കാരണമായി.