ബിഎസ്ഇയിൽ നിന്നും ലഭിച്ച രേഖകൾ പ്രകാരം, ഏകദേശം 400-ഓളം ലിസ്റ്റഡ് കമ്പനികളാണ്, അഥവാ കൃത്യമായി പറഞ്ഞാൽ 384 സ്മോൾ ക്യാപ്, മിഡ് ക്യാപ് വിഭാഗം കമ്പനികളുടെ പ്രൊമോട്ടർമാരാണ്, 2023 ഡിസംബർ മുതൽ 2024 സെപ്റ്റംബർ വരെയുള്ള കാലയളവിൽ തങ്ങളുടെ ഓഹരി വിഹിതം താഴ്ത്തിയത്.
കമ്പനിയിൽ തങ്ങൾക്കുള്ള ഓഹരി വിഹിതം പ്രൊമോട്ടർമാർ താഴ്ത്തുന്നത് പുതുമയുള്ള ഒരു കാര്യമല്ലെങ്കിലും കഴിഞ്ഞ വർഷം പ്രൊമോട്ടർമാരുടെ ഓഹരി വിൽപ്പനയിൽ വമ്പൻ വർധനയുണ്ടായാതാണ് ചർച്ചകൾക്ക് വഴിമരുന്നിടുന്നത്.
ആഭ്യന്തര വിപണിയിൽ ശക്തമായ മുന്നേറ്റം പ്രകടമായ സന്ദർഭത്തിൽ, ഓഹരികളുടെ വിപണി വിലയിലുണ്ടായ വമ്പൻ വർധനയിൽ നിന്നുള്ള നേട്ടം മുതലെടുക്കാൻ പ്രൊമോട്ടർമാർ ശ്രമിച്ചുവോ എന്ന ചോദ്യമാണ് പ്രധാനമായും ഉയരുന്നത്.
കഴിഞ്ഞ രണ്ട് വർഷമായി സ്മോൾ ക്യാപ്, മിഡ് ക്യാപ് കമ്പനികളുടെ പ്രൊമോട്ടമാർ ഓഹരി വിൽക്കുന്ന പ്രവണത ഗണ്യമായ രീതിയിൽ വർധിച്ചിട്ടുണ്ട്. നാലിൽ ഒരു കമ്പനി എന്ന തോതിൽ പ്രൊമോട്ടറുടെ ഓഹരി വിൽപന നടന്നിട്ടുള്ളതായി കാണാം.
കഴിഞ്ഞ ഒരു വർഷത്തിനിടെ മാത്രം സ്മോൾ ക്യാപ്, മിഡ് ക്യാപ് കമ്പനികളുടെ ഓഹരി വിൽപനയിൽ നിന്നും പ്രൊമോട്ടർമാർ 1.2 ലക്ഷം കോടി രൂപയാണ് കീശയിലാക്കിയത് എന്ന് ഡിഎസ്പി മ്യൂച്ചൽ ഫണ്ട് പുറത്തിറക്കിയ ഒരു റിപ്പോർട്ടിൽ ചൂണ്ടിക്കാട്ടുന്നു.
അതേസമയം ലാർജ് ക്യാപ് വിഭാഗത്തിൽ നിന്നുള്ള കമ്പനികളിൽ ഒരു ഡസനിൽ താഴെയുള്ള പ്രൊമോട്ടർമാർ മാത്രമേ സമാന കാലയളവിനിടയിൽ ഓഹരി വിൽപ്പന നടത്തിയിട്ടുള്ളു എന്നതും ശ്രദ്ധേയം.
എന്തുകൊണ്ട് ഓഹരി വിൽപ്പന?
ആഭ്യന്തര വിപണിയിൽ വൻ മുന്നേറ്റമുണ്ടായപ്പോൾ പ്രൊമോട്ടർമാർ ഓഹരി വിൽപ്പനയ്ക്ക് തുനിഞ്ഞതിന് പിന്നിൽ നിരവധി കാരണങ്ങൾ ഉണ്ടാകാമെന്ന് പ്രമുഖ മാർക്കറ്റ് അനലിസ്റ്റ് ആയ ദീപക് ജസാനി പറഞ്ഞു.
ഇതിൽ ഒന്ന്, കമ്പനികൾ ലിസ്റ്റ് ചെയ്യുന്ന വേളയിൽ പ്രൊമോട്ടറുടെ ഓഹരി വിഹിതം 75 ശതമാനമായി നിജപ്പെടുത്തണമെന്ന സെക്യൂരിറ്റീസ് ആൻഡ് എക്സ്ചേഞ്ച് ബോർഡ് ഓഫ് ഇന്ത്യ അഥവാ സെബിയുടെ മാർഗനിർദേശം പാലിക്കുന്നതിന്റെ ഭാഗമായിട്ടാകാം.
ഇതിനായി സെക്കൻഡറി മാർക്കറ്റിൽ പ്രൊമോട്ടറുടെ പക്കലുള്ള ഓഹരികൾ വിൽക്കുകയോ അല്ലെങ്കിൽ ഓഫർ ഫോർ സെയിൽ അഥവാ ഒഎഫ്എസ് മുഖേന ഓഹരി കൈമാറ്റം ചെയ്യുകയോ വേണം.
അതുപോലെ തങ്ങളുടെ മറ്റ് സംരംഭങ്ങളിലേക്ക് ആവശ്യമായ പണം സ്വന്തം നിലയിൽ സ്വരൂപിക്കുന്നതിന്റെ ഭാഗമായും ലിസ്റ്റ് ചെയ്ത കമ്പനിയിലുള്ള ഓഹരി വിഹിതത്തിൽ നിന്നും ഒരുഭാഗം വിൽപ്പന നടത്താൻ പ്രൊമോട്ടർമാർ തയ്യാറായിട്ടുണ്ടാകും.
സമാനമായി തങ്ങളുടെ സമ്പത്തിന്റെ വൈവിധ്യവ്തകരണത്തിനായും പ്രൊമോട്ടർമാർ ഓഹരി വിൽപ്പന നടത്താമെന്നും വിപണി വിദഗ്ധൻ ദീപക് ജസാനി ചൂണ്ടിക്കാട്ടി. വിപണി ശക്തമായി മുന്നേറുന്ന വേളയിൽ ഓഹരികൾക്ക് മികച്ച വില കിട്ടുന്നത് ഇത്തരം നീക്കങ്ങൾക്ക് പ്രേരണയേകാമെന്നും അദ്ദേഹം വ്യക്തമാക്കി.
2024 കലണ്ടർ വർഷത്തിൽ ബിഎസ്ഇ സ്മോൾ ക്യാപ് സൂചിക 24 ശതമാനവും ബിഎസ്ഇ മിഡ് ക്യാപ് സൂചിക 22 ശതമാനം വീതവും മുന്നേറ്റം രേഖപ്പെടുത്തിയപ്പോൾ പ്രധാന ഓഹരി സൂചികയായ സെൻസെക്സ് ആകട്ടെ 9 ശതമാനം നേട്ടം മാത്രമേ കുറിച്ചിട്ടുള്ളു എന്നതും ശ്രദ്ധേയമാണ്.
ഉയർന്ന വാല്യൂവേഷന്റെ ആശങ്കയോ?
സമീപകാലത്ത് സ്മോൾ ക്യാപ്, മിഡ് ക്യാപ് വിഭാഗം ഓഹരികളിൽ ശക്തമായ മുന്നേറ്റം പ്രകടമായപ്പോൾ അധികരിച്ച മൂല്യമതിപ്പ് അഥവാ വാല്യൂവേഷൻ എക്സ്പെൻസീവ് ആണെന്ന ആശങ്കയും മറുവശത്ത് പൊന്തിയിരുന്നു.
അതുകൊണ്ട് തന്നെ പ്രൊമോട്ടർ ഓഹരി വിഹിതം താഴ്ത്തുന്ന നടപടിയെ, ഓഹരിയുടെ വാല്യൂവേഷനുമായി ബന്ധിപ്പിച്ച നിരീക്ഷണങ്ങളും നിരവധിയുണ്ടായി. പ്രൊമോട്ടർ വിഹിതത്തിലുണ്ടാകുന്ന ഏറ്റക്കുറച്ചിൽ കമ്പനിയുടെ പ്രവർത്തനങ്ങളെ നേരിട്ട് സ്വാധീനിക്കാത്തതിനാൽ ഓഹരിയുടെ വാല്യൂവേഷനുമായി ബന്ധപ്പെടുത്തി ചിന്തിക്കുന്നതിനേയും തെറ്റുപറയാനാകില്ല.
എന്നിരുന്നാലും പ്രൊമോട്ടറുടെ ഓഹരി വിഹിതം ഗണ്യമായ തോതിൽ താഴ്ത്തുകയോ അല്ലെങ്കിൽ തുടർച്ചയായി എല്ലാ വർഷങ്ങളിലും ഓഹരി വിഹിതം കുറച്ചു കൊണ്ടേയിരിക്കുകയോ ആണെങ്കിലാണ് നിക്ഷേപകർ ആശങ്കപ്പെടേണ്ടതുള്ളു എന്ന് മാർക്കറ്റ് അനലിസ്റ്റ് ദീപക് ജസാനി വ്യക്തമാക്കി.
നിക്ഷേപകർ എന്ത് ചെയ്യണം?
മറ്റാരേക്കാളും വ്യക്തമായി കമ്പനിയുടെ അകവും പുറവും സംബന്ധിച്ചുള്ള നിജസ്ഥിതി അറിയാവുന്ന പ്രൊമോട്ടറുടെ ഓഹരി വിഹിതത്തിൽ ഉണ്ടാകുന്ന ഏറ്റക്കുറച്ചിലുകളിൽ നിന്നും മറ്റ് നിക്ഷേപകർക്കും ഏറെക്കാര്യങ്ങൾ വായിച്ചെടുക്കാനാകും.
എന്നിരുന്നാലും ചില ഘടകങ്ങൾ കൂടി മനസ്സിലാക്കിവെക്കുക. ആദ്യമായി പ്രൊമോട്ടർ ഓഹരി വിൽക്കാനുള്ള സാഹചര്യം വ്യക്തമായി പരിശോധിക്കുക. നിയമപരമായ നിബന്ധനകൾ പാലിക്കുന്നതിനാണോ വ്യക്തിപരമായ ആവശ്യങ്ങൾക്കായാണോ അതോ കമ്പനിയെ കുറിച്ചുള്ള ആശങ്ക കാരണമാണോ ഓഹരി വിൽപനയെന്ന് വിലയിരുത്തുക.
അതുപോലെ ഓഹരി വിഹിതത്തിൽ എത്രത്തോളം കുറവുണ്ടായെന്നും പരിശോധിക്കുക. ഗണ്യമായ തോതിലാണെങ്കിൽ കമ്പനിയെ കുറിച്ച് വിശദമായ പഠനം നടത്തേണ്ടത് അനിവാര്യമാണ്.
അതേസമയം കമ്പനിയുടെ അടിസ്ഥാനപരമായ ഘടകങ്ങൾ വിലയിരുത്തുക.
പ്രൊമോട്ടർ ഓഹരി വിൽക്കുന്ന വേളയിലും കമ്പനിയുടെ അടിത്തറ ശക്തവും ഭദ്രവുമെങ്കിൽ അത്രയധികം ആശങ്കപ്പെടാനില്ല. കമ്പനിയുടെ വരുമാനത്തിന്റെയും ലാഭത്തിന്റേയും വളർച്ച, കട ബാധ്യത, മൊത്തത്തിലുള്ള ബിസിനസ് തന്ത്രം എന്നിവയൊക്കെ പരിശോധിക്കുക.
അതുപോലെ പ്രൊമോട്ടർ ഓഹരി വിഹിതം താഴ്ത്തുമ്പോൾ മറുവശത്ത് ഇൻസ്റ്റിട്യൂഷണൽ ഇൻവെസ്റ്റേഴ്സ് ആണോ ഈ ഓഹരികൾ വാങ്ങിക്കൂട്ടുന്നത് എന്ന് ശ്രദ്ധിക്കുക. ഇൻസ്റ്റിട്യൂഷണൽ ഇൻവെസ്റ്റേഴ്സ് ആണെങ്കിൽ പോസിറ്റീവ് ലക്ഷണമായി കരുതാം.
കമ്പനി ഉൾക്കൊള്ളുന്ന സെക്ടറിന്റെ ട്രെൻഡും ഭാവി സാധ്യതകളും വിലയിരുത്തണം. ചുരുക്കത്തിൽ പ്രൊമോട്ടറുടെ വിൽപ്പനയുടെ സന്ദർഭവും പശ്ചാത്തലവും കൂടി കണക്കിലെടുത്തുവേണം അന്തിമ നിഗമനത്തിലെത്താൻ എന്ന് സാരം.
