ഇന്ത്യയിൽ നികുതി റിട്ടേൺ ഫയൽ ചെയ്തവരിൽ ഒരു കോടിക്ക് രൂപക്ക് മുകളിൽ വരുമാനമുള്ള 9.54 ലക്ഷം പേർ; എണ്ണത്തിൽ അഞ്ചുമടങ്ങ് വർധന

ന്യൂഡൽഹി: രാജ്യത്ത് ഒരു കോടി രൂപക്ക് മുകളിൽ വരുമാനമുള്ള 9.54 ലക്ഷത്തിലധികം ആളുകൾ ആണ് ഒക്ടോബർ 31 വരെ ആദായനികുതി റിട്ടേൺ സമർപ്പിച്ചത്.

2024-25 സാമ്പത്തിക വർഷത്തിലെ ഏറ്റവും പുതിയ കണക്കുകൾ പ്രകാരം, ഒരു കോടി രൂപ ക്ലബ്ബിലെ മൊത്തം 2.76 ലക്ഷം വ്യക്തികൾ ഒക്‌ടോബറിൽ മാത്രം നികുതി റിട്ടേൺ സമർപ്പിച്ചിട്ടുണ്ട്. സെപ്റ്റംബറിൽ 2.38 ലക്ഷം പേർ റിട്ടേൺ സമർപ്പിച്ചു.

10 കോടി രൂപക്ക് മുകളിൽ വരുമാനമുള്ളവരുടെ എണ്ണവും ഉയർന്നിട്ടുണ്ട്. 10 കോടി രൂപയിൽ കൂടുതൽ വരുമാനമുള്ള 26,449 പേർ ആദ്യ ഏഴു മാസങ്ങളിൽ റിട്ടേൺ സമർപ്പിച്ചു.

10 കോടി രൂപയോ അതിൽ കൂടുതലോ വരുമാനമുള്ള 8,064 നികുതിദായകർ ഒക്ടോബറിൽ മാത്രം ആദായനികുതി റിട്ടേൺ സമർപ്പിച്ചു. ഏപ്രിൽ, മെയ് മാസങ്ങളിലാണ് കുറഞ്ഞ നികുതി റിട്ടേണുകൾ ഫയൽ ചെയ്തത്.

2024-25 സാമ്പത്തിക വർഷത്തിൽ ആകെ സമർപ്പിച്ച റിട്ടേണുകളുടെ എണ്ണം 8.11 കോടിയാണ്. കേന്ദ്ര പ്രത്യക്ഷ നികതി 2024-25 അസസ്‌മെൻ്റ് വർഷത്തേക്കുള്ള നിയമ പ്രകാരം ആദായനികുതി റിട്ടേണുകൾ നൽകുന്നതിനുള്ള അവസാന തീയതി നീട്ടിയിട്ടുണ്ട്. ഒക്ടോബർ 31ൽ നിന്ന് നവംബർ 15 വരെയാണ് തിയതി നീട്ടിയത്.

കോടീശ്വരൻമാർ പെരുകുന്നു
രാജ്യത്ത് നികുതിദായകരായ കോടീശ്വരൻമാരുടെ എണ്ണം 2024 അസസ്മൻ്റ് വർഷത്തിൽ അഞ്ചുമടങ്ങ് വർധിച്ചിരുന്നു. എസ്ബിഐ സാമ്പത്തിക ഗവേഷണ റിപ്പോർട്ട് അനുസരിച്ച്, 2013 സാമ്പത്തിക വർഷത്തിൽ കോടീശ്വരൻമാരായ നികുതിദായകരുടെ എണ്ണം 44,000 ആയിരുന്നെങ്കിൽ ഇപ്പോൾ ഇത് 2.24 ലക്ഷം പേരാണ്. 2024 സാമ്പത്തിക വർഷത്തിലെ കണക്കാണിത്.

ഒരു കോടി രൂപയിലധികം രൂപ വരുമനാമുള്ള വ്യക്തികളുടെ എണ്ണം 2013-14 വർഷം മുതൽ 2023-24 വരെ അഞ്ചിരട്ടിയായി വർധിച്ചു. ഇപ്പോൾ ലഭിച്ചിരിക്കുന്ന മൊത്തം നികുതി വരുമാനത്തിൻ്റെ 56.7 ശതമാനം നേരിട്ടുള്ള നികുതിയാണ്.

14 വർഷത്തിനിടയിലെ ഏറ്റവും ഉയർന്ന ശതമാനമാണിത്.

നികുതി നിയമങ്ങൾ കർശനമായതിനൊപ്പം റിട്ടേൺ ഫയലിംഗ് എളുപ്പമായതും സുതാര്യതയും കൂടുതൽ നികുതിദായകരെ ആകർഷിക്കുന്നു. ഇപ്പോൾ വാട്സാപ്പ് വഴിയും നികുതി റിട്ടേൺ ഫയൽ ചെയ്യാം.

എല്ലാവർക്കും നികുതി ഫയലിംഗ് ലളിതമാക്കാൻ ലക്ഷ്യമിട്ടുള്ളതാണ് നടപടി. ഫോണുകൾ ഉപയോഗിച്ച് തന്നെ റീഫണ്ട് ക്ലെയിം ചെയ്യാനുമാകും.